خوشا جانانیلن همدرد و همراز اولدوغوم گونلر

سر کویینده ایت لرله هم آواز اولدوغوم گونلر

الیمده تار زلفی قصه پرداز اولدوغوم گونلر

کونولده ناز عشقی سوزیلن ساز اولدوغوم گونلر


اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

 

سنه شایسته دیر گولمک نه چون بیر غنچه لب گول سن

حرام اولسون اگر اغیاریلن من سیز دئییب گولسن

ائدیب سن سینه می پیکان غملن بیله گول گول سن

یانار قلبین منیم احوالیمه گر حالیمی بولسن


اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

 

اگر من سیز گولوم گئتسن تماشای گولوستانه

گوروم دونسون الهی لاله تک باغرین قیزیل قانه

گؤزون بیمارییم نرگس الینده آلما پیمانه

لبین قوربانییام سالما نظر گلبرگ خندانه


اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

 

اگر آلسان اله ساغر الینده باده قان اولسون

حرامی باشه چکسن حاشالله نوش جان اولسون

دونوب پیمانیه باخسان اؤزه اشکین روان اولسون

اؤزون مخمور،چشمین مست،غمزه ن سرگران اولسون


اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

 

گؤروم شمع رخین مندن سورا پروانه سیز قالسین

ایراق گؤزده ن گؤزون بی سرمه زولفین شانه سیز قالسین

ائده ن قان کونلومی ،می گون لبین پیمانه سیز قالسین

او ایکی نرگس مستین می و میخانه سیز قالسین


اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

 

منی ترک ایلیوب گر یاریم اولسا اؤزگه لر یاری

گؤروم عالمده اولسون من کیمی غملر گرفتاری

داغیلسین رونق بازاری اسکیلسین خریداری

گئجه گوندوز اؤزه اشک ندامت ایله سین جاری


اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

 

گزیب من گؤرمه دیم دنیانی محنت خانه دن غیری

تاپیلمازکنج راحت گوشه ی میخانه دن غیری

انیس بزم خلوت یوخ غم جانانه دن غیری

دئمه صراف سنده یازدیقین افسانه دن غیری


اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای