عکسی از دانش آموزان دبستان سوده یکان کهریز( 1394)
قیزلارا باخ قیزلارا
قیزلار باتیب دوزلارا
قیز اولماسا دوز اولماز
گؤیلرده اولدوز اولماز
قیز آتانین گؤزودو
آنانین سئوگولودو
قیزین گؤزو دریادی
اوره ک دولو سئودادی
بير قوجا كيشي ايله آروادي اوغلانلاريني ائولنديرميشديلر، اما گلين اليني آغدان قره يه وورموردو.ائوي توز – تورپاق گؤتورموشدو، لاكين گلين بير دفعه ده اولسون سوپورگه ني گؤتوروب ائوي سوپورموردو. اه ر ايله آرواد بئله قرار لاشديلار كي صاباح كيشي سوپورگه ني گؤتوروب ائوي سوپورمه يه باشلاسين آرواد گليب اونون اليندن آليب دئسين كي كيشي اوچون ائو سوپورمك عاييب دي بلكه گلين اوتانيب گليب سوپورگه ني اونلارين اليندن آليب ائوي سوپورسون، بيلسين كي بو ايش اونون وظيفه سيدي. صاباح كيشي سوپورگه ني گؤتوروب ائوي سوپورمه يه باشلادي آرواد قاچدي قاباغا:
- اي واي كول باشيما، كيشي ده ائو سوپوره ر مي وئر منه گؤروم.
كيشي سوپورگه ني الينده برك – برك ساخلاييب دئدي:
- يوخ سنين ايشين ده ييل، ائو نه واقتدي سوپورلنمييب، زيبيل باش آليب گئدير.
آرواد دئدي:
- يوخ قويمارام، آرواد اولان يئرده عاييبدي كيشي نين ائو سوپورمه يي. بو منه اؤلومده ن بته ردي...
اونلار سوپورگه ني بير- بيري نين اليندن چكيرديلر كي، گلين قاباغا گليب اللريني بئلينه ووروب قيشقيردي.
-آخماق قوجالار! اوتانميسيز بو ساده ليك ده ايشين اوستونده ساواشيسيز. بونون كي ساواشماغي يوخدو، نوبت قويون بير گون سن سوپور بير گون او...
منبع:آذربايجان فولكلورو(رحمتليك ميرهدايت حصاري)
بیرگون بیر یالانچی بیر مجلسده دئدی :منیم دده مین بیربویوک طویله سی وار ایدی کی آت طویله نین بو باشیندا بوغاز اولسایدی اوباشینا یئتیشه نه تک دوغاردی.
بیری یئریندن قووزانیب دئدی:اوکی بیر زاد دییل منیم دده مین بیر اوزون آغاجی وار ایدی هر واقت گوی بولوت اولسایدی او آغاجی اوزالدیب بولوتلاری داغیداردی.
اوولکی یالانچی دئدی:په آتووینان یالان صاحابی...او یئکه لیکده آغاجی هارا قویاردی؟
ایکینجی یالانچی دئدی:سنین دده ن طویله سینه.
بیرگون تولکی قاچیردی بیر نفردئدی:
تولکو نه اولوب نییه قاچیرسان؟
تولکو دئدی :دوه لری توتوللار!
دئدی:به سن نییه قاچیرسان؟سن کی دوه ده ییلسن!
دئدی:من گلیب ثابت ائدینجه کی من دوه ده ییلم،منیم ده ریمی بوغازیمدان فیریغ چیخاردارلار!
ملا دئدی:اوغرو هارا گئتسه آخیردا گلیب بوردان گئچه جک .
"آدینی دئمه قوی بئلیمه"
بیری قیزدیرمیشدی،ائوده هر نه واریدی سالدیلار اوستونه،یئنه دئییردی کی اوشویوره م.بیری دئدی کی داها بیر زاد قالمییب تکجه بیر پالان قالیب.نا خوش دئدی:آدینی دئمه قوی بئلیمه.
"اوسته کی یورقانی گوتور ترله دیم"
بیری ده قیزدیرمیشدی،ائوده هر نه واریدی اوستونه سالدیلار یئنه ده دئییردی اوشویوره م.تک بیر سو ایله دولو قازان قالمیشدی اونودا او بیری شئی لرین اوستوندن قویدولار.ناخوش ترپشدیکده قازانین سویو تؤکولدی اوستونه.چیغیراراق دئدی:اوسته کی یورقانی گؤتورون دئیه سن ترله دیم.
"ایکی یالانچی"
بیر گون بیر شهرین مشهور یالانچی سی او بیری شهرده کی یالانچینی گؤروب اونونلا باغلاشماق اوچون او شهره گئتدی.سوروشوب یالانچی نین ائوینی تاپدی.قاپینی دؤیدوکده ،بیر بئش –آلتی یاشلی کیچیک قیز قاپینی آچدی.کیشی اوشاقدان سوروشدوکی:
بالاجا قیز ده ده ن هاردادی؟
قیز دئدی:
-گوی ییرتیلیب ده ده م گئدیب اونو یاماسین.
کیشی بونو ائشیتدیکده ائله اوردان قه ییتدی.
دئدی:بیر آدامین کی بئش یاشیندا اوشاغی بئله بیر بؤیوک یالان دئیه ،اودا یئر یالانی عوضینه گؤی یالانی دئیه، گؤر اونون اوزون نمنه اولا بیلر.
منبع:آذربایجان فولکلورو-یازانی :رحمتلیک میر هدایت حصاری
"اوخوماق ایله عؤمرون مناسبتی"
بیرنفر ظریف آدام دئیه ردی:
آدام ائولنمه میشدن قاباق اوخویاندادئیه ر:ای یار...ای یار...ای یار
ائولنه ندن سورا دئیه ر: ای داد...ای داد...ای داد...
ائله کی اوشاغی اولدو دئیه ر:بالام آی ...بالام آی...
ائله کی قوجالدی دئیه ر:یازیق اولان جانیم ای وای...
منبع:آذربایجان فولکلورو-یازانی :رحمتلیک میر هدایت حصاری
الیف ایله گیلیف
بیرگون بیر اوشاغی مکتبه قویدولار.موللا اول گؤنو الفبانین ایلک حرفینی اؤیره تمه ک اوچون او حرفی گؤستریب دئدی:
-دئنه،الیف
اوشاق دئدی:
-گیلیف
موللا دئدی:الیف
اوشاق گئنه دئدی:گیلیف
بیرنئچه گون موللا هر نه قده ر اوشاغی ووروب ، دؤیدوکی دئسین الیف،اوشاق دئدی :گیلیف
موللا داها یورولدو.
بیر نفر دئدی:آخی اوشاق سنین مگر بئینین داشدی،دمیردی نه دی؟ بیرالیفی اؤیرنمک کی بیر زاد ده ییل،اونون اوستونده بیر یئله کؤته ک یئییرسن.
اوشاق دئدی:بابا من الیفی ائله اول گونده اؤیره نمیشم اما قورخورام دئیه م الیف دالیسینجا دئیه کی:دئنه ،ب
منبع:آذربایجان فولکلورو-یازانی :رحمتلیک میر هدایت حصاری
"گؤیده ایت سسی"
بیر گون ایکی یولداش واریدی.
بیری عادتا چوخ یالانچی ایدی وعادتینی ترک ائده بیلمیردی.او بیری دوستو چالیشیردی کی اونون یالان لارینی بیر جور ایله اؤرت –باسیر ائله سین . بیر گون بیر مجلسده یالانچی یولداش دئدی:
-دوننلری من چؤلده ن گلیردیم گؤردوم کی گؤیدن بی رایت سسی گلیر ،بیر قوچوق (ایت بالاسی)گؤیده ونگیلدییردی.هامی دئدی بئله شئی اولماز قارداش گؤیده ایت نه قایریرکی،سسی گلسین.
یولداشی تئز اوزون آرایا آتیب دئدی:
-یوخ قارداش اولا بیلر.مثلا مومکون دور کی بیر چاغالان بی رایت کوچوغونو قایناغینا آلیب گؤیه آپارمیش اولا و اوردا ونگیلدییه و سسی گله .
مجلسده ن ائشییه چیخاندان سونرا دوستونا دئییر :دوستوم دانیشیردین آخی بئر یالانی دانیشاردین بس نئیه گؤی یالانی دانیشدین.
منبع:آذربایجان فولکلورو-یازانی :رحمتلیک میر هدایت حصاری
ادب لی نؤکر
بیر بؤیوکون بیر دوشونجه لی نؤکری وارایمیش. بیرگون بیر قوناقلیق دا اوچ دویو دنه سی ،آغاسی نین ساققالینا دوشدوگونو گؤردوکده،مجلس اهلی بیلمه میش او دویولری گؤتورسون دئیه بو شعری اوخویور.
آغالار آغاسی به گ لرین خاصی
بیر سؤز عرض ائیله ییم ،اؤلدورمه منی
زراووشان داغیندا،اوچ اوو گؤرموشم
گؤنده ر بئش قارداشی یئندیرسین اونی
آغا ایسه موضونو دوشونره ک ،الینی ساققالینا چکیب دویولری سالیر.
منبع:آذربایجان فولکلورو-یازانی :رحمتلیک میر هدایت حصاری
شق القمر
بیر کیشی ائوینه قایدارکن آروادینین اوزونده جیرماق یئری گؤردوک ده تعجب له سوروشور:
ماه رویینده نه دیر ابر کیمی لکه پری
آروادکی اؤزوده شعر اهلی ایمیش جوابیندا دئییرکی:
مصطفی بارماغی دیرشق ائله ییب دیر قمری
بئله لیک له "شق القمر"حدیثیندن استفاده ائده رک اوغلو مصطفانین (پیغمبرین ده بیر آدی مصطفی ایمیش)اوزونو جیزدیقی نی ظریف لیک له بیان ائدیر.
منبع:آذربایجان فولکلورو-یازانی:رحمتلیک میرهدایت حصاری
نام:میربهرام (خانلار)