بعضی لر فخر ائتمیر شانلی ائلینه
قیمت وئرمیر ائللر سئوه ن دیلینه
تازاجا دیل آچمیش کؤرپه اوشاغا
اؤز آنا دیلینی ائدیرقاداغا
اوشاغااؤز دیلی غریبه اولور
یابانچی سؤزلرله قولاغی دولور
چوخ ساده ساناراق بونا فخر ائدیر
دوز یولون اؤتوروب آیری یول گئدیر
دئییر بس دونیادا چوخ شئی لر قانیر
بئیله نادان لیغی تمدّ ن سانیر
یادلار تک بؤیودور طیفیل اوشاغی
دیلینه خور باخیر اؤزگه سایاغی
بیلمیرکی هر کسه اؤزو گره ک دیر
اؤز ائلی،اؤز دیلی، سؤزوگره ک دیر
بعضه ن ده جور به جور دلیل گتیریر
داها دا من لیگین ، شاًنین ایتیریر
دئییر کی ایستیره م قولاغی دولسون
ایندی دن قوی دیلی یاتیملی اولسون
عقده لی اولماسین او بؤیویه ن ده
اوخویوب الیفی ، بئیی دئیه ن ده
بونا تای سؤزلردن دوزه ر یان- یانا
یاراشماز بو سؤزلر قانان اینسانا
دئییره م آی یازیق یولوندان چاشما
اؤزگه چوخ دولاشیر دا سن دولاشما
یاراشماز اؤز دیلین ذلیل ساناسان
یاراشماز اؤز کؤکون بئیله داناسان
اؤزدیلین سئومه یه ن ائلین سئومه یه ن
نه اوچون یاشاییر دونیادا دئیه ن
غئیره تی اولماسا بیر کسین اگر
اونا اینسان دئمه ک اولورمو مگر؟
گؤرمه میش آداملار ایتیره ر اؤزون
جهالت پرده سی تئز توتار گؤزون
گؤره رسن اؤزکؤکون قینین به یه نمز
عیللتین سوروشسان هئچ نه دئیه نمز
قورو بوش افاده ،دیل نه دیر بیلمز
آنا نه دیر بیلمز، ائل نه دیر بیلمز
دیل بیر سیجیللی دیر بیز بونو قاناق
اونو حفظ ائتمه یی وظیفه ساناق
دیل وطن،دیل آنا،دیل بیراوره ک دیر
دیل اینسانین وارلیغی نا گره ک دیر
دیل اولمازسا هئچ بیر میللت تانیلماز
میللت لر ایچین ده میللت سانیلماز
دیل دیر هر انسانین اؤز هؤییتی
دیل دیر هر میللته وئره ن قیمتی
دیل اولمازسا نه آنا وار نه وطن
دیل اولمازسا طعنه وورار هر یئته ن
ان اوره ک سئوگیسی آنا دیر آنا
اوره گین گوزگوسو آنا دیر آنا
آنا لار سئویلیر محبّت ایله
آدلاری اوجالیر شفقّت ایله
بس نییه نه اوچون دانیرسان آنان
آناسین چوخ سئوه ر هر بیر یارانان
بو قده ر خور باخما دوغما دیلینه
تحقیرله یاناشما شانلی ائلینه
اوغلونا قیزینا اؤیره ت اؤز دیلین
تانیسین اولوسون ، تانیسین ائلین
سنه بیر سؤزو ده دئییم بیل گیلن
گؤزون دن جهالت توزون سیل گیلن
اوولادین آنلی یان چیخسا بیل یقین
سنی دانلایاجاق امین اول امین
ائیله کی بؤیویوب ائللره یاندی
یاخشی نی یامانی دریندن قاندی
دئیه جک نه گؤزه ل دیلیم وار ایمیش
غئیره تلی، ویقارلی ائلیم وار ایمیش
یازیق آتام- آنام نه اوچون بئله
اؤز آنا دیلینی قانماییب هله
منه اؤیره ت دیلر اؤزگه نین دیلین
اینسان دا آتارمیش ؟ اوباسین ائلین
دئییب دیر عالیم لر بونو همیشه
بیر میللت آغاج سا دیل اونا ریشه
الین دن آلسالار دیلین هر کسین
قازار لار دونیادان اونون ریشه سین
بیز گره ک قورویاق آنا دیلینی
باشی اوجا توتاق آذر ائلینی
یادگار قویوب لار ائللر - اوبالار
تاریخین زینتی اولو بابا لار
اوره گیم ایسته ییر صدف لی سازلا
قوشولام ائللره بیر خوش آوازلا
یایام دونیالارا قلبیمین سسین
اوجالدام گؤی لره کؤنول نغمه سین
سؤیلویه م آی آنا قوربانام سانا
اوره گیم ، ایسته گیم ، آذربایجانا
من سنی سئویره م بوتون جانیملا
ایلیگیم ، سوموگوم ، قیزیل قانیملا
ای آنـا ، ای وطن ، ای مقدّسیم
سن – سن بو دونیادا سسیم، نفسیم
اوره کدن وورغونام باغلی یام سنه
لوطفونو شامیل ائت همیشه منه
سن سیز هئچ دیاردا گزه بیلمه ره م
سن سیز بیر لحظه ده دؤزه بیلمه ره م
سندن آیریلمارام چونکی جانیمسان
شوکتیم ، عیزّتیم ، آدیم ، سانیمسان
«حاصارلی» یام عاشیق اولدوم ائلیمه
اوره کدن وورولدوم دوغما دیلیمه
اوره ک سؤزلریمی چکدیم داستانا
تقدیم ائتدیم اوغلوم ( رضا اورمانا)
اودا جان یاندیرار من تک ائلینه
اوره کدن وورغون دور آنا دیلینه
اونون تشویق لری ذووقوم چوخالدیر
یئنی الهام لاری من ده اوجالدیر
گؤزه ل یول گؤسته ریب جاندان یاناندیر
اؤزو صاحب نظر دوزگون قاناندیر
سؤزومه سون قویوم من ده نهایت
اومیدیم وار ائده بونلار کفایت
شعر:فریدون حاصارلی (یکان کهریزلی)
نام:میربهرام (خانلار)