آذربایجان شعری یکانکهریزین سوادسیز شاعری میرصادق آغوزی دن
آذربایجان ائشیدیبدی بولوبدی
سنه سد وورانلار چوخدان اؤلوب دی
نیه آراز سنی ایکی بؤلوب دی
آرامیزدان گئچیر سئل آذربایجان
اردوباد عربلر آرازا باخار
آراز بوروخ وئیردریایه آخار
سنین گؤزللرین سیرانه چیخار
اوزونه یاییلار تئل آذربایجان
چاتیبدی باش باشا دومانلی داغلار
دره دوز نخجوان قوشا جلفالار
اونلار بیربیریندن الهامین آلار
هر ایکیسی سنده ائل آذربایجان
آذربایجان لارین مرکزی تبریز
تبریز بیر شهردی گورمویوبسوز سیز
گلین قوجاقلاشاق بیربیریمیز
افسوس کی یئتیشمیر ال آذربایجان
اؤز یئرینده دانیشیرسان گولورسن
سنده اؤز وطنین تعریف ائدیرسن
کئفین سوروشورام جاواب وئرمیرسن
حتما آزاد ده ییل دیل آذربایجان
اوستومدن گئتمه سین توپراقین تؤزون
ایشیقلی اوجاقین،سؤنمه سین کؤزون
هئچ اوتانماگینان دئه منه سؤزون
قدم قوی بیزلره گل آذربایجان
گؤزوم یولدا قالدی گؤزوم یورولدی
آراز اوسته کؤرپولرین وورولدی
اوغلان قیزان توی مجلسی قورولدی
سینه ن اوسته سازی چال آذربایجان
آرزوم بودور عؤمری باشا وئره سن
شاد گونونده آل قوماشی گییه سن
دونیا دولی ناز و نعمت ییه سن
آغزین شیرین اولسون بال آذربایجان
جهانین گؤزو سن جهاندا ازل
آغاجین پوتاغین گؤرمه سین خزل
زنوز آلماسی تک صورتین گؤزل
یاناقدا گؤرونور خال آذربایجان
آذربایجان باهار اولسون یاز اولسون
گؤللر دولی اوردک اولسون غاز اولسون
مجلسینده صحبت اولسون ساز اولسون
آرادا خرج لنسین پول آذربایجان
آذربایجان چوخ ایگیدلر یوروبدی
الله قدرتینن قلم ووروبدی
آنان سنی خوش ساعتده دوغوبدی
بورونوب آل یاشیل شال آذربایجان
آذربایجان سن گلمیرسن من گلیم
آراز انلی دوشوب یئتیشمیر الیم
ایسته میرم عربلرین آغ یئلین
گونده ر منه مه دن یئل آذربایجان
یاز اولاندا گول چیچه گین آچیلسین
جیرانلارین داغدان داغا قاچیلسین
یای گلنده بوغدالارین بیچیلسین
خرمنده چئوریلسین ول آذربایجان
جانان اودور هر جانانه جان دئمز
عاشیق اولان غصه یئمز غم یئمز
گؤزللیگده هئچ کس سنه بنزه مز
ایراندا غنی سن بول آذربایجان
آذربایجان منده سنه ماییلم
دین محمد دینی دینه قاییلم
یوسف دن آرتیقام اسکیک دگیلم
ساخلاسان قاپیندا غول آذربایجان
گؤزوم قالدی املاکیندا زمینده
شریک اولدوم شادلیقیندا غمینده
دوشمن یاتمییب دور دوروب کمینده
گؤزله اولمویاسان هول آذربایجان
تاریخلر ایچینده آدین سانی نوار
سنین نئچه نئچه قهرمانی نوار
بللی ایگیدلرین ستارخانین وار
دوشمنه ایشله در فئل آذربایجان
قوزی اتی دویولرین بوغلانیر
یئییب ایشمه ک داماخلارین چاغلانیر
تبریزینده آغیر یوکلر باغلانیر
دارچینین موخئیین،هل آذربایجان
آل الواندی چادرلارین یوردلارین
اوبا کناریندا اولار قوردلارین
الده شمشیر یهرلنسین آتلارین
گوموشدن وورولوب نال آذربایجان
آذربایجان سندن الهام آلمیشام
گؤزی یاشلی بولوت کیمین دولموشام
سوادسیز شاعرم یالقیز قالمیشام
آختار منی هردن بول آذربایجان
یاخشی یامان بو دنیادان کؤچه جک
اجل شربتینی بیر گون ایچه جک
بیر گون گلر یولون بوردان دوشه جک
دوشه قبریم اوسته سال آذربایجان
گول چیچک دی باغچالارین باغلارین
آلمالارین هیوالارین نارلارین
سویی سرین ،داشی مرجان چایلارین
هاوادا بولوت اول دول آذربایجان
باشی اوجا داغلاریندان قارآلدیم
گول چیچگلی باغلاریندان بار آلدیم
سسیمه سس وئردین سسن های آلدیم
عؤمرون اوزون اولسون طول آذربایجان
من یورولمامیشام،سنده یورولما
الین وئر الیمه الدن قیریلما
آذربایجان زور دییه نه وورولما
بیله گین قوتی قول آذربایجان
نبی بئی هاجرین یاران نئج اولدی
خان چوپان مغانین ساران نئج اولدی
شهر گنجه قاچاق کرم نئج اولدی
آرازا کؤرپی اول پل آذربایجان
ایرانلی اوغلویام یودوم ایراندی
دین محمد دینی کتاب قرآندی
سؤزلری سؤیله دیم دیلده بیاندی
الیمدن تحفه نی آل آذربایجان
ائشیتگینن بی سوادین سؤزلرین
قاشین کمان آیدین اولسون گؤزلرین
عمر ایله سین اوغلان لارین قیز لرین
دنیا بویی یاشا قال آذربایجان
نام:میربهرام (خانلار)