تورکی غزل
"ائتدین"
گئجه گلدین یوخوما غصه دن آزاد ائتدین
گون هایاندان دئه چیخیب دیر کی منی یاد ائتدین
آه و ناله م گویه چیخمیشدی غم هجریندن
ائوین آباد اولا یورغون اوره یی شاد ائتدین
دئه دانیش نازیله سن لعل لبین قوربانی
گلمه گینله بو سینیق کونلومه ایمداد ائتدین
اولسا مین جانیم عزیزیم سنه نذر ائیله میشم
عقلیمی آلدین الیمدن منی فرهاد ائتدین
نازیله شوخ باخیشی ، سندن آلیبدیر جئیران
اولمایا سن بو خومار باخماقی ایجاد ائتدین
سرو بوی، لاله یاناق ، قونچا آغیزسان گؤزه لیم
"خانلاری" شعر و غزل یازماغا معتاد ائتدین
+ نوشته شده در سه شنبه بیست و ششم آبان ۱۳۹۴ ساعت 11:44 توسط میر بهرام رستمی
|
نام:میربهرام (خانلار)