بيري اوشاقليقدا يئتيم اولوبدي

غم اليندن ساراليبدي سولوبدي

فلك قول قانادين ديبده ن يولوبدي

دئییرلر گولگونن گوله بیلمیرم

 

بيرينين واري وار قيلينجي كسير

بيرينين قيچي يوخ چرخ اوسته گزير

بيرينين اوستونه سويوق يئل اسير

دئییرلر گولگونن گوله بیلمیرم

 

بيري قوجاليبدور يوخدور داياغي

بيري ناكام گئديب يانمير چيراغي

بيري چوله دوشوب مجنون ساياغي

دئییرلر گولگونن گوله بیلمیرم

 

بيرينين گؤزونده ن ياشلار توكولور

بيرينين غصه دن قلبي سوكولور

بيري داردا قاليب بئلي بوكولور

دئییرلر گولگونن گوله بیلمیرم

 

بيري حسرت قاليب اوشاق دادينا

بيري عسل قويور قيزين آدينا

كاش هامي چاتايدي اؤز مرادينا

دئییرلر گولگونن گوله بیلمیرم

 

آنالار ناله سی گویلره چيخير

بوله ن اينسانلارين جانيني سيخير

قاپيسين باغلايير ائويني ييخير

دئییرلر گولگونن گوله بیلمیرم

ميربهرام رستمي(خانلار)