یئکاناتا بیر باخیش

سنین فراقیندا واللاه تالانمیشام نئیلیم

گئجه گونوز غمه چولقالانمیشام نئیلیم

محبت ائت منه سن گل دییه ک گوله ک دانیشاق

قیزیل سایاق سوزونه من اینامیشام نئیلیم

او یئرلری کی سنیلن دولانمیشیق باهم

گوزوم یاشی آخاراق تک دولانمیشام نئیلیم

گوزوم سنین یولون ایزلیر اوره ک سنه باغلی

ده آیریلیق غمینه من بویانمیشام نئیلیم

آنا اینان من اوچون سن ایکینجی کعبه م سن

نه جور طواف ائده بیللم یوبانمیشام نئیلیم

فرشته سن آناجان سن بهشته لایق سن

پیمبرین سوزونو بئیله قانمیشام نئیلیم

سنین یئره ن من اؤلردیم گئدییدی آرامیم

نئجه دوزوم یاشاماقدان اوسانمیشام نئیلیم

آنا گومان ائله مزدیم بیزی قویوب گئده سن

پوزولموشام ،هله ایندی اویانمیشام نئیلیم

یوخوندو روحوم آنا آیریلا بو جسمیمده ن

گئد یبدی صبروقراریم دایانمیشام نئیلیم