باهالیق شعری
من اولدوم دونیادان خسته
اولوب قیرخ مین تومن پوسته
گئدیر گوندن گونه اوسته
اخا ایمداده گل اولدوم
من اولدوم دونیادان خسته
اولوب قیرخ مین تومن پوسته
گئدیر گوندن گونه اوسته
اخا ایمداده گل اولدوم
اولوب اوچ مین تومن آلما
اوشاق سویلور منه دولما
دوشاب ایستیر چالاق حالوا
اخا ایمداده گل اولدوم
ات ائتدی دیده می گیریان
اولوبدی جیب لریم عوریان
گئدیب قارنیم دوشور توممان
اخا ایمداده گل اولدوم
تویوخ اندامیوه قوربان
سن ائتدین باغریمی آلقان
یئییر وارلی ائدیر طوفان
اخا ایمداده گل اولدوم
دویو یاغیله بادیمجان
یازیخ جانیم سیزه قوربان
هارا سیز گئتمیسیز مهمان
اخا ایمداده گل اولدوم
صفه دوردوم چوره ک آلدیم
پولوم قورتولدی مات قالدیم
ایکی اللی دیزلره چالدیم
اخا ایمداده گل اولدوم
نه جور سویله قالیم زنده
پولوم یوخدور وئره م قنده
باهالیق ائتدی شرمنده
اخا ایمداده گل اولدوم
اگر خوش ایله سم صحبت
قیزیلدان سوز آچار عورت
آلار اندامیمی وحشت
اخا ایمداده گل اولدوم
خوشوم گلمز دییه م بهتان
ائدیبدور جنس لر طغیان
نه ائتسین بو یازیق انسان
اخا ایمداده گل اولدوم
بیری آجدی بیری توخدی
مروتدن خبر یوخدی
اگر من سوز یازام چوخدی
اخا ایمداده گل اولدوم
نام:میربهرام (خانلار)