یادیما دوشنده قیزیل سؤزلرین

زامان شوروشدوقجا چیخیر دوزلرین

کاش اولایدین من اؤپردیم گؤزلرین

یامان داریخمیشام سن سیز آتاجان

 

سن دییه ردین پیسه یاخشیلیق ائله

محبتین بالا گتیرمه دیله

بئش گونلوک دنیادی سوروشار بئله

یامان داریخمیشام سن سیز آتاجان

 

سن دییه ردین بالا حارامی یئمه

یییه نلر دونیادا دوشوبلر غمه

بیرده کی دییه ردین افترا دئمه

یامان داریخمیشام سن سیز آتاجان

 

سن دییه ن سؤزلری ایندی قانمیشام

عملیم اولمویوب اوتدا یانمیشام

غمه بونا گؤره چولقالانمیشام

یامان داریخمیشام سن سیز آتاجان

 

نه اولاردی بیرده سنی گؤیه ردیم

سن آلان خرمادان بیرده یییه ردیم

اوره ک سؤزلریمی سنه دیییه ردیم

یامان داریخمیشام سن سیز آتاجان

 

سندن اون ایل یازام وار هله سؤزوم

والله آتا سن سیز قورتولوب دؤزوم

سنه قوربان هرگون مین دفعه اؤزوم

یامان داریخمیشام سن سیز آتاجان