میرحسینقلی ریاحی فر استادیمیزدان بیر گؤزل شعر
سنه وورغون اولارلار دونيا بويو قوچاقلار
سن گلسن يارپاقلانار لاپ قوروموش بوداقلار
هر اؤلكه ده آچيلار سنله بوتون ياساقلار
ائل سني هارايلايار دينمزليكدن بئزنده
"سئوه جه يم من سني سن مني سئومه سنده"
الوان دونلو چيچكلر بوروينده آغاجي
مين گؤلدن آخان آراز دولاناندا قيقاجي
قيزيل لاله كؤز كيمي قيزارداندا ياماجي
گونه باخان بوينونا سارماشيق قول هؤرنده
"سئوه جه يم من سني سن مني سئومه سنده "
قيرميزي بير چاي كيمي اولدوز گؤيدن آخاندا
اوزوندن چكيب اؤرپك آي باجادان باخاندا
ساللارا ايشيق دوشوب ايلديريملار شاخاندا
دان يئري آغاراندا قارا گئجه بيتنده
"سئوه جه يم من سني سن مني سئومه سنده"
اووچو اوولاري بوسوب اوخ قوياندا كامانا
ياخشي لارين گوجلري چاتماياندا يامانا
يالقوزاق توي توتاندا داغ باتاندا دومانا
قاپ ـ قارانليق گئجه ده شاختا سسي كسنده
"سئوه جه يم من سني سن مني سئومه سنده"
سن يئره جان وئررسن آييلا اوزو گوله
دئمده ياغيشين سويو جان باغيشلار سونبوله
سنله يوكسله جه يم قوي بونو ائللر بيله
بايرام يئلي اسنده نووروز گولو گولنده
"سئوه جه يم من سني سن مني سئومه سنده "
سني دئييب قورتولوش بايراغين ائل آچاندا
بوغونتو يارادانلار آياق آليب قاچاندا
دمير قفسلر سينيب قوشلار آزاد اوچاندا
آنالار بالالاري بالا آنا اؤپنده
"سئوه جه يم من سني سن مني سئومه سنده "
اينانماكي سؤندوره اودومو قارا كولك
بير گون چيچك آچاجاق قلبيمده اولان ديلك
(سيّد)م سؤز وئريرم گؤزوم ائيله سه كؤمك
عؤمروم اولدوقجا سورام يئرين دورنا اؤتنده
"سئوه جه يم من سني سن مني سئومه سنده"
نام:میربهرام (خانلار)