قلم دیر قلم ،بارک الله قلم(معجز شبستری)
اودور رستمی راکیب رخش ائده ن
اودور هیکل نادری نقش ائده ن
شاه عباسه نام نکو بخش ائده ن
قلم دیر قلم ،بارک الله قلم
یازار گونده مین لرجه فرمان سخت
اه یر باش اونا صاحب تاج و تخت
سپهدار و سردار و سالار بخت
قلم دیر قلم ،بارک الله قلم
قلم یازدی چون قتل فرمانینی
اوروس" چاری "نین تؤکدولر قانینی
ائده ن خلع هم تؤرک سولطانینی
قلم دیر قلم ،بارک الله قلم
قلمدن سؤال ائیله سن" ممدعلی"
نچون تختدن دوشدی اولدی دلی؟
سبب کیمدی ؟سؤیلر به صوت جلی:
قلم دیر قلم ،بارک الله قلم
ائدنمزدی عالمده سئیروسفر
قلم ائتمه سه یدی بیزی باخبر
نگارنده ی نقشه ی بحروبر
قلم دیر قلم ،بارک الله قلم
اگر اولماسایدی جهاندا میداد
کیم ائیلردی خیام وسعدینی یاد
سخندان شیرین زبان بلاد
قلم دیر قلم ،بارک الله قلم
اگر اولماسایدی جهاندا قلم
دئییلمزدی دونیاده نام عجم
علمدار فردوسی مؤحترم
قلم دیر قلم ،بارک الله قلم
اؤلوب شیخ محمود جنت مکان
قالیب" گؤلشن راز"اوندان نیشان
اونو شؤهره ی شهر ائده ن دوستان
قلم دیر قلم ،بارک الله قلم
اجل باغلاییب صابیرین گؤزلرین
قویوب یاقیز اوغلان لارین قیزلارین
دیری ساخلایان "هوپ هوپ"ون سؤزلرین
قلم دیر قلم ،بارک الله قلم
دئدیم چون هانی حافیظ ای دهر شوم؟
نؤلوب شمس،عطار،موللای روم؟
دئدی:نئیلیسن؟ایندی بحرالعلوم
قلم دیر قلم ،بارک الله قلم
گؤموب خسروی،هاتیفی گورکن
بیچیب لعلی یه ،صائیبه هم کفن
بوشاعیرلرین نامین احیا ائدن
قلم دیر قلم ،بارک الله قلم
جهان قالدی یاران نه خاقانی یه
نه ابن یمینه ،نه قاآنی یه
او کی دال چئویرمز بو دیوانی یه
قلم دیر قلم ،بارک الله قلم
گئدیب دهردن عرفی و انوری
وئریب جان هم او جامی وجوهری
بو گون اونلارین واریث اکبری
قلم دیر قلم ،بارک الله قلم
جهاندا اگر اولمایایدی میداد
سنایینی آیا کیم ائیلردی یاد
بابا طاهره یاور خوش نهاد
قلم دیر قلم ،بارک الله قلم
اسیر ائیله ییب ایرجی روزگار
نیظامی نی ،خواجونی هم بی قرار
او کی اؤلمز هرگز یاشار بی شمار
قلم دیر قلم ،بارک الله قلم
دئدیم آغلایا آغلایا ای قلم
هانی سبزواری هانی محتشم
دئدی:معجز الساعه حی الامم
قلم دیر قلم ،بارک الله قلم
نام:میربهرام (خانلار)