پریشان خاطرم زولفون کیمی ای ماه دل آرا

آلیبدیر دؤره می غم لشکری من بی کس وتنها

مبارک آدین ازبردی دیلیمده ائتمه رم پروا

همیشه سسلرم ای غمگساریم هارداسان تئز گل

 

محبت له منی دیندیر سنه قوربان اولا جانیم

صفاسی عالمین یوخ سنسیز ای سرو خرامانیم

منیم سن هر زادیمسان ای گؤزل شمع شبستانیم

وقاریم،عزتیم،دارونداریم هارداسان تئزگل

 

نیگارا اولموشام چوخداندی من عشقین خریداری

بیلیرسن بینوا کؤنلوم اولوب زولفون گیریفتاری

نیقابین چک کناره ماه رخسارین گؤروم باری

طبیبیم،سید والا تباریم ،هارداسان تئز گل

 

ائدیبلر گنج عشقین قلبیمی بیگانه لردن پاک

فراقین ائیله ییبدور کؤنلومی افسوس اولا غمناک

اوزون چون مصطفی نورانی قلبین چون محمد پاک

امامیم ،رهبریم،آی افتخاریم هارداسان تئزگل

 

متاع نقد جان الده گؤزوم یولدا قالیب یارا

ائله هیجران یوروبدورکی اؤرکده قالمییب یارا

هایاندا قالمیسان اذن ظهور آل یوسف زهرا

تؤکندی صبر،گئتدی ایختیاریم هارداسان تئز گل

 

ویصالین حسرتینده شیعه اولموش دیده پر نم گل

دومانلی داغ کیمی دونیانی توتموش گؤرنئجه غم گل

عدالت غصه مرگ اولموش جهاندا ،عدل عالم گل

قارانلیقدیر غمینده روزگاریم هارداسان تئز گل

 

غم هیجرین ائدیبدیر شانه تک کؤنلوم ائوین شان شان

تفضل قیل ائله بو دردهیجرانه اؤزون درمان

نصیب ائت "اکبری"اولسون قدوم پاکیوه قوربان

ویصاله قیل مبدل اینتظاریم هارداسان تئز گل