حاج علی نشانی 1305-نجی گونش ایلینده آذربایجان جمهوریتی نین قازاق شهرینده آنادان اولوب .آتاسی مرند شهرستانی نین یکانات ماحالیندا یئرله شن ، یوخاری یئکن(یکان علیا)لیدیر.حاج علی 1312- ده اؤز عائیله سی ایله اورمویا کؤچوب و ساکن اولوب..اؤز دئدیگینه گؤره17 یاشیندان شعر دئمه یه باشلاییب و بیر شعر کیتابی دا (عؤمور یوللاریندا) چاپا یئتیریب. بو شاعیرین نئچه شعری خالق ماهنیسینا چئوریلمیش کی بیری " باغبان قیزی" و بیری ده " بند ماهنی سی " دیر.
بوشاعیر باغبان قیزی بارده اؤزو بئله سؤز آچیر: جاوانلیق زامانلاریمدا ، باغبان قیزی منیم مایل اولدوغوم بیر قیز ایدی و او زامان من بزاز لیق ایشینه مشغول ایدیم .اونون آتاسی گول باغبانی ایدی ، بونا گؤره من شعریمده اونا"باغبان قیزی " آدی قویدوم. نهایت همَن قیز منه قیسمت اولمادی.بو شعریم موسیقی معلیمی اسماعیل شاکری وسیله سی ایله ماهنییا تبدیل اولوب ، اورمیه رادیوسوندا اوخوندو.سونرا مرحوم مصطفی پایان وسیله سی ایله تهران رادیوسوندا اوخوندو و بئله لیکله بیر خالق ماهنی سی کیمی دیللره دوشدو.(1327-1328)دئمه لییم کی باغبان قیزی ماهنی سی استانبول شهرینده ده اوخونوب .حاج علی نین ایندی لیکده اورمونون بازاریندا آرشین مال چیلیق لا مشغول ، پارچا توکانی وار و قوجالیق بو شاعیری سارسیتساماغینا رغما، چوخ خوش صؤحبت بیر شاعیر دیر.


"باغبان قیزی"
ای خومار باخیشلی باغبان قیزی
چادراسی سورمه یی گولو قیرمیزی
گؤزون خومارلادیر گؤیده اولدوزو

آمان باغبان قیزی ، جان باغبان قیزی
یاناغی قیرمیزی، جان باغبان قیزی

بازاردا ساتدیغیم شالدی قوماشدی
گؤردوم باغبان قیزین دیلیم دولاشدی
باخدیم گردنبنده گؤزوم قاماشدی

آمان باغبان قیزی ، جان باغبان قیزی
یاناغی قیرمیزی، جان باغبان قیزی

من ده بیر اوغلانام صاف و صادقم
ثروت آختارمیرام حوسنه عاشیقم
جمالین گؤرمه یه خیلی شایقم


آمان باغبان قیزی ، جان باغبان قیزی
یاناغی قیرمیزی، جان باغبان قیزی

 

خوش بئجردیب آتان گول لردن سنی
یاخشی ائشیتمیشدیم دیل لردن سنی
ایسته سم آلاردیم ال لردن سنی

آمان باغبان قیزی ، جان باغبان قیزی
یاناغی قیرمیزی، جان باغبان قیزی